ដោយ ម៉ម មុនីរតន៍
2012-05-09
ជាថ្មីម្តងទៀត លោកនាយករដ្ឋមន្រ្តី ហ៊ុន សែន ប្រកាសថា រដ្ឋាភិបាលនឹងមិនឲ្យពលរដ្ឋណាមួយត្រូវស្លាប់ដោយអត់បាយនោះទេក្នុងអាណត្តិរបស់លោក។
លោកនាយករដ្ឋមន្ត្រី ហ៊ុន សែន ក្នុងសន្និសីទកាសែតស្ដីពីជម្លោះព្រំដែនជាមួយថៃ នាវិមានសន្តិភាព រាជធានីភ្នំពេញ នៅថ្ងៃទី១៧ ខែកុម្ភៈ ឆ្នាំ២០១១។
Click to listen here
ការថ្លែងយ៉ាងដូច្នេះរបស់ប្រមុខរដ្ឋាភិបាល ត្រូវគេដឹងថា គឺធ្វើឡើងដើម្បីធានាពីគោលការណ៍របស់កាកបាទក្រហមកម្ពុជា ដែលភរិយារបស់លោកជាប្រធាន។ ក៏ប៉ុន្តែសាររបស់លោកនាយករដ្ឋមន្រ្តីនៅពេលនេះ ត្រូវបានអ្នកតាមដានការវិវត្តន៍ស្ថានការណ៍សង្គម និងពលរដ្ឋរងគ្រោះដោយការបណ្ដេញចេញចំអកថា ធ្វើឡើងក្នុងន័យគាំទ្រគោលនយោបាយគណបក្សប្រជាជនកម្ពុជាតែប៉ុណ្ណោះ។
ការថ្លែងបែបនេះរបស់លោកនាយករដ្ឋមន្ត្រី ហ៊ុន សែន ធ្វើឡើងនៅទីស្នាក់ការកណ្តាលកាកបាទក្រហមកម្ពុជា រាជធានីភ្នំពេញ ខណៈគំរប់ខួបលើកទី ១៤៩ នៃទិវាកាកបាទក្រហម និងអឌ្ឍចន្ទក្រហមពិភពលោក នៅថ្ងៃទី៨ ខែឧសភា ឆ្នាំ២០១២។
ថ្លែងនៅក្នុងពិធីនោះ លោកនាយករដ្ឋមន្ត្រីប្ដេជ្ញាថា នឹងមិនបណ្ដោយឲ្យមានពលរដ្ឋណាមួយប្រឈមមុខស្លាប់ដោយការអត់បាយនោះទេ៖ «បទបញ្ជារបស់រាជរដ្ឋាភិបាលដែលថា មិនទុកឲ្យប្រជាជនណាម្នាក់ស្លាប់ដោយអត់បាយដោយយើងមិនបានដឹង ហើយមិនបានដោះស្រាយ ត្រូវបានអនុវត្តដោយមានប្រសិទ្ធភាព។ ខ្ញុំសង្ឃឹមថា ពាក្យស្លោកនេះ និងបទបញ្ជាដែលមានចរិតជាពាក្យស្លោកនេះ នឹងបន្តអនុវត្តតទៅទៀតតាមរយៈយន្តការរដ្ឋបាល និងតាមរយៈយន្តការកាកបាទក្រហម»។
ផ្ទុយពីការលើកឡើងរបស់នាយករដ្ឋមន្ត្រី អ្នកឃ្លាំមើលការវិវត្តន៍ស្ថានការណ៍សង្គម និងអ្នករងគ្រោះដោយការបណ្តេញចេញពីលំនៅឋាន តាមរយៈការផ្តល់ដីសម្បទានសេដ្ឋកិច្ចធ្វើឡើងដោយរដ្ឋាភិបាល រិះគន់ថា ការថ្លែងសារបែបនេះរបស់លោកនាយករដ្ឋមន្រ្តី ហ៊ុន សែន ពុំបានឆ្លុះបញ្ចាំងពីភាពពិតដែលពួកគេកំពុងប្រឈមនោះទេ។
លោក ទូច ខន តំណាងពលរដ្ឋនៅភ្នំបាត ដែលត្រូវបានក្រុមហ៊ុនផានអ៊ីម៉ិច បណ្ដេញចេញកាលពីដើមឆ្នាំ២០១២ មានប្រសាសន៍ថា បន្ថែមលើការប្រឈមទៅនឹងពុំមានទីជម្រក និងបន្តរង់ចាំការផ្ដល់ដីដែលក្រុមហ៊ុនសន្យាថា នឹងប្រគល់ជូនពួកគាត់នោះ។ លោកអះអាងថាសព្វថ្ងៃនេះពលរដ្ឋទាំងនោះកំពុងប្រឈមមុខអត់បាយអស់រយៈពេលជាច្រើនថ្ងៃកន្លងមកហើយ ពុំដែលឃើញកាកបាទក្រហម ឬមន្រ្តីរដ្ឋាភិបាលចុះដោះស្រាយសម្រាប់ពួកគាត់នោះទេ។
លោក ទូច ខន៖ «ឥឡូវពួកគាត់ដាច់បាយដាច់អីអស់ហើយ ព្រោះអីឥឡូវហ្នឹងសូម្បីលុយទិញអង្ករបបរហូបក៏អត់មានដែរ។ ឥឡូវហ្នឹងខ្ញុំគ្រាន់តែចង់សំណូមពរឲ្យរដ្ឋាភិបាល អាជ្ញាធរដែនដីគ្រប់លំដាប់ថ្នាក់ និងអង្គការក្រៅរដ្ឋាភិបាលជួយសម្លឹងមើលគាត់ ដែលគាត់រស់នៅភ្នំបាត ដែលគាត់ជម្លៀសចេញពីបុរីកីឡាមកនៅភ្នំបាតនេះ។ ជួយសម្លឹងមើលគាត់ផង ព្រោះអីឥឡូវគាត់យ៉ាប់យ៉ឺនមែនទែន»។
លោក អ៊ូ វីរៈ ប្រធានមជ្ឈមណ្ឌលសិទ្ធិមនុស្សកម្ពុជា និងជាអ្នកវិភាគបញ្ហាសង្គម។ លោកចាត់ទុកថា សារនយោបាយនេះ ធ្វើឡើងគ្រាន់តែសម្រាប់ការពារភាពស្អាតស្អំនៅក្នុងរបបរបស់លោកនាយករដ្ឋមន្រ្តី ហ៊ុន សែន។ លោកថា ខុសពីការថ្លែងនេះ ក្នុងពេលបច្ចុប្បន្នមានពលរដ្ឋជាច្រើនកំពុងប្រឈមមុខចំពោះការបាត់បង់លំនៅឋាន គ្មានដីធ្លីសម្រាប់ប្រកបមុខរបរ ព្រោះតែការផ្តល់ដីសម្បទានឲ្យទៅក្រុមហ៊ុនឯកជនវិនិយោគ និងមួយចំនួនទៀតស្លាប់ដោយសារអត់បាយផងដែរ។
លោក អ៊ូ វីរៈ៖ «យើងដឹងហើយ តើថា មានអ្នកស្លាប់អត់បាយហ្នឹងច្រើនគ្នាហើយតើ! ដូច្នេះការតាំងចិត្តថា មិនឲ្យមានអ្នកស្លាប់ដោយអត់បាយហ្នឹង ដែលជាតាំងចិត្តមួយដ៏ល្អ ដែលពួកខ្ញុំស្វាគមន៍។ ប៉ុន្តែបើសិនគោលនយោបាយដីសម្បទានច្រើន គោលនយោបាយអនុញ្ញាតឲ្យអ្នកធំទិញតុលាការបាន អ៊ីចឹងគឺថា អាហ្នឹងប្រជាពលរដ្ឋរាប់លានទៅជាជនរងគ្រោះហើយ»។
ក៏ប៉ុន្តែអ្នកស្រី ម៉ែន នារីសោភ័ណ្ឌ អគ្គលេខាធិការកាកបាទក្រហមកម្ពុជា មានប្រសាសន៍ថា គោលការណ៍កាកបាទក្រហមកម្ពុជា ផ្តោតសំខាន់គឺកម្មវិធីមនុស្សធម៌សម្រាប់ជនរងគ្រោះដោយទឹកជំនន់ ខ្យល់ព្យុះ និងអាកាសធាតុរាំងស្ងួតជាដើម។
អ្នកស្រីចាត់ទុកថា ពលរដ្ឋដែលរងផលប៉ះពាល់ពីការបណ្ដេញចេញ គឺពាក់ព័ន្ធនឹងប្រព័ន្ធច្បាប់ ពុំមែនជាគោលការណ៍របស់កាកបាទក្រហមកម្ពុជានោះទេ៖ «បើថាច្បាប់គេមានចែងយ៉ាងម៉េច គេអនុវត្តដាក់កំណត់ប៉ុន្មានថ្ងៃៗ អាហ្នឹងវាជារឿងមួយផ្សេងទៀត កុំយកមកច្របាច់បញ្ចូលគ្នាអត់បានទេ»។
របាយការណ៍របស់កាកបាទក្រហមកម្ពុជា ឲ្យដឹងថា ចំណូលសម្រាប់ឆ្នាំ២០១២ ទឹកលុយដែលទទួលបានមានចំនួនជាង ១០លានដុល្លារ។ តួលេខនេះមានការកើនឡើង នោះបើប្រៀបធៀបទៅនឹងរបាយការណ៍ឆ្នាំ២០១១ ដែលមានចំនួនតែជាង ៩លានដុល្លារសហរដ្ឋអាមេរិក។
ទោះជាបែបណា ពលរដ្ឋតែងរិះគន់ថា ការបែងចែកអំណោយធ្វើឡើងដោយពុំបានផ្ដល់តម្លាភាពសម្រាប់ពលរដ្ឋទូទៅនោះទេ ពោលគឺអង្គភាពមួយនេះតែងផ្ដល់លទ្ធភាពអ្នកដែលគាំទ្រគណបក្សប្រជាជនកម្ពុជា ជាជាងគណបក្សក្រៅរដ្ឋាភិបាល ឬបក្សប្រឆាំង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
0 comments:
Post a Comment