ដោយ សុខ សេរី
2012-05-15
លោកនាយករដ្ឋមន្ត្រី ហ៊ុន សែន ព្រមានសម្ដេចក្រុមព្រះ នរោត្តម រណឫទ្ធិ ឲ្យឈប់ប្រើប្រាស់ព្រះនាម និងព្រះឆាយាល័ក្ខណ៍របស់អតីតព្រះមហាក្សត្រ ព្រះបាទ នរោត្តម សីហនុ ដើម្បីឃោសនាបោះឆ្នោត នៅពេលខាងមុខនេះ។
សម្ដេចក្រុមព្រះ នរោត្ដម រណឫទ្ធិ ថ្លែងទៅកាន់សមាជិក សមាជិកាគណបក្ស នរោត្ដម រណឫទ្ធិ បន្ទាប់ពីអង្គសមាជវិសាមញ្ញបានជ្រើសតាំងព្រះអង្គជាប្រធានគណបក្ស នរោត្ដម រណឫទ្ធិ នៅមជ្ឈមណ្ឌលទួលគោក រាជធានីភ្នំពេញ នៅថ្ងៃទី១១ ខែធ្នូ ឆ្នាំ២០១០។
Click here to listen to Mr. Koy Dechor
លោកនាយករដ្ឋមន្ត្រី ហ៊ុន សែន នៅថ្ងៃទី១៥ ខែឧសភា ឆ្នាំ២០១២ បានអះអាងថា គណបក្សប្រជាជនកម្ពុជា កំពុងតែកាន់អំណាច គឺជាគណបក្សដែលការពាររបបរាជានិយម និងរាជបល្ល័ង្កពិតប្រាកដ ហើយអ្នកណាចង់បំផ្លាញរបបរាជានិយមនេះ លុះត្រាតែលោកស្លាប់សិន។
លោកបានព្រមានមិនឲ្យមេដឹកនាំគណបក្សនយោបាយមួយចំនួន រាប់ទាំងប្រធានគណបក្ស នរោត្តម រណឫទ្ធិ គឺសម្ដេចក្រុមព្រះ នរោត្តម រណឫទ្ធិ យករបបរាជានិយមធ្វើជាកម្មសិទ្ធិផ្ដាច់មុខ ឬជាកម្មសិទ្ធិរបស់រាជវង្សានុវង្ស ពីព្រោះរបបរាជានិយម គឺជាកម្មសិទ្ធិទាំងអស់គ្នារបស់ប្រជាពលរដ្ឋខ្មែរ បើមិនដូច្នោះទេនឹងមានវិបត្តិធ្ងន់ធ្ងរនៅកម្ពុជា។
ការព្រមាននេះបានធ្វើឡើងនៅមុនពេលយុទ្ធនាការឃោសនាបោះឆ្នោតជ្រើសរើសក្រុមប្រឹក្សាឃុំសង្កាត់ អាណត្តិទី៣ ដែលនឹងចាប់ផ្ដើមនៅថ្ងៃទី១៨ ខែឧសភា ដល់ថ្ងៃទី១ ខែមិថុនា ឆ្នាំ២០១២។ មានគណបក្សនយោបាយចំនួន ១០ ចូលរួមការបោះឆ្នោតនោះ នៅថ្ងៃទី៣ ខែមិថុនា ឆ្នាំ២០១២។
លោកនាយករដ្ឋមន្ត្រី ហ៊ុន សែន បានមានប្រសាសន៍នៅក្នុងពិធីសំណេះសំណាលជាមួយតាអាចារ្យចំនួនជាង ៣២០០នាក់ នៅមហោស្រពកោះពេជ្រថា ការប្រើប្រាស់ព្រះកិត្តិនាមរបស់ព្រះមហាក្សត្រមកឃោសនាបោះឆ្នោត គឺជាការកេងចំណេញនយោបាយ ប៉ះពាល់ដល់ព្រះកិត្តិយស និងព្រះចេស្ដា។
លោក ហ៊ុន សែន៖ «ព្រោះអ្នកដែលការពាររាជានិយមកំពុងតែអង្គុយនៅឯនេះ កំពុងតែនិយាយនេះ។ បួនកៅអីយកមកធ្វើផេះអី? ៩០កៅអីដែលអាចកែប្រែរដ្ឋធម្មនុញ្ញបាន គេកំពុងតែការពារ។ ខ្លួនឆ្លៀតយកចំណេញច្រើនលើកច្រើនសាហើយ គេមិនថាផង រហូតដល់មួយបែបថាអាក្រក់ស្ដាប់ ស៊ីកេរឪ។ បើស្រឡាញ់សម្ដេចឪបោះឆ្នោតឲ្យ ហ៊្វុនស៊ិនប៉ិក និយាយឲ្យច្បាស់អ៊ីចឹងណា! អ៊ីចឹងអ្នកចាញ់ដោយទាំងព្រះករុណា សម្ដេចឪ សីហនុ ទៀត។ ប៉ុន្មានអាណត្តិដែលឃោសនារបៀបនេះ? ទៅអាប់ឱនព្រះកិត្តិនាមរបស់សម្ដេចឪ ដែលលោកអត់ដឹងផង។ ព្រោះរាជានិយម ជារបស់រួមរបស់ជាតិ សេ្តចជាស្ដេចរបស់យើងទាំងអស់គ្នា មិនមែនស្ដេចរបស់រាជវង្សទេ ហើយបើសិនជាគ្រាន់តែរបស់រាជវង្សប៉ុន្មាននាក់ គឺច្បាស់ជាអន្តរាយហើយ អាហ្នឹងសូមផ្ដាំទុក»។
ប្រតិកម្មទៅនឹងការព្រមាននេះ អ្នកនាំពាក្យរបស់គណបក្ស នរោត្តម រណឫទ្ធិ លោក ប៉ែន សង្ហារ និងជាសមាជិកគណៈកម្មការនាយក បានមានប្រសាសន៍បំភ្លឺថា សម្ដេចក្រុមព្រះ នរោត្តម រណឫទ្ធិ មិនបានប្រើប្រាស់ព្រះកិត្តិនាមរបស់អតីតព្រះមហាក្សត្រមកឃោសនាបោះឆ្នោតទេ ប៉ុន្តែគណបក្សនេះមានគោលនយោបាយថា ជាគណបក្សរាជានិយម និងមានត្រីវិស័យដើរតាមរបបរាជានិយមកន្លងមក។
លោក ប៉ែន សង្ហារ៖ «គណបក្ស នរោត្តម រណឫទ្ធិ ជាគណបក្សដែលប្រកាន់យកនូវមាគ៌ានយោបាយកណ្ដាល គឺជាការប្រមែប្រមូលនូវកម្លាំងអ្នកបោះឆ្នោត ប្រមែប្រមូលនូវប្រជាពលរដ្ឋអ្នកបោះឆ្នោត ដែលជាអ្នករាជានិយម អ្នក សីហនុ និយម អ្នកជាតិនិយម អ្នកស្នេហាជាតិ ។ គណបក្ស នរោត្តម រណឫទ្ធិ ជាគណបក្សមួយ ក្ដីសង្ឃឹមសម្រាប់ប្រជាពលរដ្ឋខ្មែរ»។
លោក ហ៊ុន សែន បានព្រមានទៀតថា បើសិនណាពុំមានការបញ្ឈប់ការប្រើប្រាស់ព្រះកិត្តិនាមរបស់អតីតព្រះមហាក្សត្រ សម្រាប់ការឃោសនាបោះឆ្នោតទេនោះ លោកនឹងនិយាយរឿងនេះជាថ្មីទៀត និងឲ្យកាន់តែខ្លាំងក្លាជាងនេះទៀត។
លោកនាយករដ្ឋមន្ត្រី ហ៊ុន សែន បានអំពាវនាវសុំឲ្យប្រជាពលរដ្ឋកម្ពុជា រាប់ទាំងតាអាចារ្យ និងដូនជីដែរនោះ បោះឆ្នោតជូនគណបក្សប្រជាជនកម្ពុជា ពីព្រោះគណបក្សនេះបានរក្សាសន្តិភាព និងស្ថិរភាពនៅកម្ពុជា តាំងពីឆ្នាំ១៩៧៩ កន្លងមក៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
0 comments:
Post a Comment